【第31屆香港電影金像獎頒獎禮宿醉賀壽】現年20歲的台灣帥哥柯震東，去年在金馬活動遇上舒淇，他立即如小粉絲等合照，今日36歲生日感情空白的舒淇也愛俊男，二人雖有年齡差距，但無損友情。舒淇落敗金像獎，心情依然大好，一晚連跑兩場，先撐寰亞慶功再踩《那些年，我們一起追的女孩》祝捷，獲柯震東慶祝生日。
舒淇昨日36歲牛一，前晚雖落敗金像獎影后，仍畀面出席寰亞搞的慶功，同時也為她提早賀壽，甄子丹夫婦、黃秋生、余文樂、劉青雲夫婦和盧海鵬等畀面出席。舒淇前晚趕兩場，其後還到九龍城會合九把刀參與《那些年，我們一起追的女孩》慶功宴，同場有舒淇小粉絲柯震東和他的雙親。
甄子丹送禮呵番
生日前夕，舒淇獲眾星相伴切蛋糕，談到生日願望，她說：「希望大家心存善念，懷着感恩嘅心去面對咁美好嘅世界。」對於頒獎禮上食白果，舒淇說：「預料之中，但今年生日收到好多禮物，好多人好關心我，呢啲日子冇白過。」
舒淇早前捲入子丹和趙文卓微博罵戰，被網友惡搞微博，子丹前晚送上Chanel手袋作生日禮物，有指用作補償，舒淇說：「唔係補償，微博嗰件事同個人冇關，係社會問題，開番微博，我想發揮才華時可寫兩句。」子丹則否認送巨禮番舒淇。
問及生日如何過？舒淇說：「宿醉到生日，同宿醉慶祝，媽咪嚟咗香港，我哋會食飯。」她跟馮德倫早前爆緋聞可有發展空間？她留後路說：「我哋十幾年好朋友，好多嘢都有機會。」她吃過蛋糕便往會柯震東，二人去年在台灣金馬惜別酒會相遇，柯震東驚艷舒淇排隊影相，而舒淇亦情迷帥哥。
陳妍希隊酒面紅
《那些年》在今屆金像獎奪得「最佳兩岸華語電影」獎項，導演九把刀拉隊與演員去九龍城食火鍋慶功，舒淇參與其中，玩到昨日凌晨3時，腳部輕浮的她提早離開。陳妍希在席間high爆狂飲，離去時臉紅紅，又以手掩臉。
採訪：文國駿、李志明
攝影：陳志嵐、楊浩賢
