傑志（圖）前日喺旺角場技壓天水圍飛馬重奪聯賽盃，賽後高層拉隊去食飯慶功；原先噚日復操，準備周四喺聯賽對公民，但教練甘巴爾最後決定放球員一日假。
傑志總領隊伍健賽後喺佢facebook激讚球隊，亦忍唔住批評球證：「美中不足之處，是朱兆基及盧均宜無辜被罰黃牌！」但伍生勞氣，可能因朱兆基已有4黃在身，因快開罰球而攞咗呢面黃牌，搞到呢位老將夠5黃，周四對公民停賽；好在之前喺操練休克嘅隊長盧比度，經檢驗後已經證實無礙，可以復出。
求大俠噚日八卦再問伍生，傑志今次捧盃有幾多獎金時，佢話大數有幾多就唔好講啦，但每個球員都有5位數字獎金獎勵，佢仲希望慶功可以陸續有嚟㖭！講番場波，盧均宜同羅志焜合作做「無敵風火輪」慶祝，原來風火輪本來3個人，但點練都唔成功，而youtube有條佢哋「苦練片」， http://www.youtube.com/watch?v=gKIlBwyOacE&feature=g-upl&context=G2fccc65AUAAAAAAAAAA，求大俠睇過相當搞笑。