冠君產業信託（2778）旗下中環甲級寫字樓花旗銀行廣場近日搞搞新意思，逢星期五放工時間，都有一場「FridaySensation」鋼琴演奏會，上星期五就請咗本地鋼琴王子陳雋騫獻奏古典名曲，歷時一粒鐘㗎。
冠君主席羅嘉瑞同華華講，搞呢啲活動係希望租客有個relax啲嘅環境，放咗工都可以輕鬆吓，當然亦希望提高花旗廣場嘅形象。佢又話，細個都有彈過吓琴，但就冇天份表演，所以都係請鋼琴王子演奏。
對於其他地產商兄弟內鬥不斷，但羅主席同細佬瑞安房地產（272）主席羅康瑞就好齊心，佢話，之前一齊搞咗上海新天地酒店項目後，都一直搵緊機會發展其他項目，但因為內地宏觀調控，所以步伐慢咗，不過機會亦都同時多咗。又睇吓羅氏兄弟第日會有乜好消息啦。