大家睇電視見到煤礦工人全身煤灰，都知道煤有幾污糟，不過做地底煤礦生意嘅弘海（065）噚日搵華華做「煤」，見證佢哋隻靚煤有幾「乾淨」！
話說弘海上星期二公佈，建議收購聯席主席麥兆中（Godfrey）私人持有嘅WealthBusiness同旗下長春國傳嘅褐煤提煉廠，Godfrey噚日就向華華介紹個提煉廠有幾勁，佢話傳統褐煤質量差，水份高又易甩色，燒煤時嘅熱量太低，能源效益好差，但經過長春國傳獨有嘅「提質技術」，用水蒸乾啲煤，就可以提高熱量，仲可以賣貴啲。
講吓講吓，長春國傳母公司北京國傳總經理馬紅松仲攞咗嚿煤出嚟畀華華睇，佢將原煤浸落水搞兩吓就甩晒色，但提揀過嘅煤就唔溶喺水。華華都分別揸過兩嚿煤炭，原煤掂吓已經成手黑晒，但提煉煤就冇乜煤灰，果然夠乾淨。