無綫同五大唱片公司嘅關係到家未完全正常番，而喺年初舉行嘅《2011十大勁歌金曲頒獎典禮》，王菀之（Ivana）冷手執個熱煎堆，首次奪得亞太區最受歡迎香港女歌星獎。近年Ivana相當努力做碟，成績唔錯，得獎係咪合理，見仁見智。不過得到個大獎，Ivana同以往得過大獎嘅歌星一樣，點都要做番啲嘢報答一下，加上家無綫鬧藝員荒，Ivana係時候出馬喇。
同祖藍談情
據馮仁昭八到話嚟緊Ivana會處女下海為無綫拍劇《老表你好嘢》（暫名），套劇由監製過《阿旺新傳》、《戇夫成龍》同埋《學警》系列嘅黃偉聲製作，其他演員包括郭晉安同王祖藍，仲有新加盟嘅萬綺雯及之前被指係祖藍老竇嘅黃光亮，祖藍好大機會做黃光亮個仔，祖藍同Ivana仲會有感情線，齋諗佢兩個嘅外型，同埋Ivana把雞仔聲，相信幾搞笑。東亞唱片發言人梁小姐噚日就Ivana係咪拍無綫劇回應：「係有傾緊，Ivana都有興趣拍，不過要再詳細傾。」