振英老頂吹雞要「以和為貴」，點知眾建制派山頭攞景者多、贈興者少。譚耀宗做搞手，睇怕都係收Order，做好做醜主催飯局，但出來效果似食「散水餅」多過「和頭飯」，反而揭示出裂痕無法填補，已去到「爛塊面」地步。
第一個型人擺明立場係金勞詹，佢之所以企硬，因為佢個席位全靠食力，上屆有人背後搞詹叔，俾佢打敗，所以詹叔有本錢企硬，仲明寸林健鋒之流乃搖風擺柳。
三類型人 企硬唔肯和解
第二個型人乃自由黨主席劉健儀，邊度係唔得閒，佢同黨友走去食厚切焗豬扒飯，就係唔出席和頭飯。外邊以為西環同自由黨有偈傾，此乃一大誤會。自由黨前身乃港英建制派，肥彭搞政改佢哋變節投靠北京，但當時西環搞出一個叫港進聯嘅親中工商界政黨，同自由黨爭功能議席，錢用咗唔少，但一事無成，最後才摺埋同民建聯合併。上屆自由黨直選失利，田北俊、周梁落敗，隨即陷入「被分裂」局面，劉皇發、劉柔芬、林健鋒等出走。今年9月自由黨要捲土重來，就一定要同振英保持距離，並要借唐英年之助選，實行敗部復活。橫計掂計都唔應該參與大和解呢場Show。
第三個型人最有性格，係親中大佬曾鈺成，在和頭飯當日擺到明寸爆，先否定和頭飯政治功能，再暗寸振英組班困難，最後穩站政治價值高地，同唐英年一樣立場，「有真普選就有大和解」。
搞運動式管香港 有難度
振英政治形象蠱惑，一般巿民睇表面認為佢誠懇，但政圈中人睇法完全相反，呢班建制山頭話事人在立法會打滾多年，有乜蠱惑嘢未見過。
當前最大利益並非協助振英提升民望登基，而是利用其弱勢，大打民意牌，擴大9月立法會勝算，霸完位先至會坐低講數，大家心知冇食力邊度有得討價還價，機管局、醫管局、房委會、城規會、商會、顧問，到荷蘭水蓋、太平紳士點分配，如果手瓜唔硬，振英睬你都儍，所謂和解只會成為收編統戰。
欠缺制度化政治力量支持，下屆政府好大可能會步重慶模式後塵，走親中民粹主義路線，用搞運動方式來進行管治。內地及新加坡可以，但在香港要成功？好難！
添馬男