最近民企風暴係財經界嘅熱門話題，唔少新上市嘅內地民企都被爆賬目問題，唔係停牌，就係股價潛水不見天日，不過有「B股之王」之稱嘅華聯國際（969）執行董事胡野碧就對民企充滿信心，叫大家唔使擔心。
「港交所把關冇問題」
好多喺香港上市嘅民企新股或半新股，最近接二連三出事，投資者同散戶都紛紛將矛頭直指港交所（388），怪佢把關不力，唔查清楚啲數就畀民企上市抽水。之不過，做過星展投資銀行部總經理、幫過好多民企上市嘅胡野碧就話，覺得港交所把關冇問題，即使美國上市嘅民企都曾經出事啦。佢話，其實優質民企都有好多間，爆煲嘅只係特別例子，所以叫大家唔使擔心嚟緊排住隊上市嘅民企咁話。