若然覺得賽車遊戲一味鬥速度、跑圈無新意的話，這次多平台車Game《RidgeRacerUnbounded》，應可讓你感受更多新鮮感。除了一向靚車靚景賣點，今集仲要求撞車、撞建築物嚟大肆破壞，最正係自己動手設計賽道，彎多定彎急隨你話事！
記者：許福合
砌賽道要先砌車
一向覺得賽車遊戲耐玩性好高，但前提是要有足夠多的賽道，若果只得幾條賽道，又或畀錢買DLC，自然無癮。《Unbounded》最吸引機迷，必然是內置地圖編輯器，賽道由頭到尾都由你設計。不過，動手之前，玩家需要先完成劇情模式，獲得經驗值後將城市賽道的拼圖解鎖，當中有直路、彎路等。當有足夠的拼圖，就可以利用地圖編輯器組合成賽道。有唔少試用過的機迷反映編輯器難用，又無教學，要花唔少時間，有如玩緊RPG！不過成功的話，滿足感十足，尤其係可以加上障礙物如垃圾桶、跳台、油罐等，再將賽道上載到伺服器，與朋友對戰，玩落更刺激。
今集開車時，車手都可以變得更加瘋狂，賽道上大部份物件都可以破壞，例如垃圾車、安全島、油站，撞過去可以粉碎障礙物，撞飛欄杆，部份建築物還可以撞出個大洞，與其他跑車碰撞，會降低跑車的耐久度，撞凹對手車身，更可以獲得分數附加大特寫鏡頭。破壞賽道及雜物，除了可以獲得分數外，更有機會撞出捷徑，縮短路線距離，但要注意玩家自己的跑車亦是有耐久度的，四處亂撞可能支持不到終點。
氮氣加速儲分
比賽模式中，《RidgeRacer》比較受歡迎模式都有保留，如筆者最愛玩的TimeAttack及DriftAttack，不過在落場試過後，唔少玩家都覺得揸法唔同咗，事關賽道周邊都可以破壞，走線略微過了就有碰撞，跑車好易失控，在《Unbounded》中，要駕駛大馬力的跑車，做出完美飄移過彎，取得好成績，相當困難。建議多使用氮氣加速，當與其他跑車近距離飛馳時，氮氣計會提升得更快，啟動加速後，跑車會瘋狂加速，留下車尾的橙色殘影，同時，更會發現正常狀態不能破壞的目標，更易取破壞分數。
主機：PS3/Xbox360/PC
類型：賽車
人數：多人
售價：約$370
查詢：i-Gamer（27253338）
