【本報訊】「就係佢喇！」美國天后LadyGaGa，下月2日將來港開四場演唱會，早前便捲起一股撲飛潮。最貴的1,580元門票，一度被炒至兩萬多元一張，有人就覷準這股熱潮斂財，以2,000元超筍黃牛價詐騙四名波友三萬多元，得手後玩失蹤。上周四（12日），受害人與騙子在中環狹路相逢，立即報警，本報直擊警犯追逐三條街拉人過程。
記者：陳兆剛、陳偉雄
上周四傍晚6時，受害人Tommy與友人在中環中遠大廈一間健身中心，發現早前以LadyGaGa飛騙取他們三萬元的騙子Taio，於是立即報警。數名軍裝警員到場後，Tommy當場指出騙子，警方將Taio帶到樓下盤問。不料盤問不足兩分鐘，疑人竟發難推開警員奪命狂奔。
打波認識 擅與人溝通
雙方展開一段追逐戰，兩警員沿皇后大道中從後追了三條街，追至機利文街疑犯終走投無路，慌忙間走進一商廈大堂，遭大批增援的警員制服，警員大叫：「叭低！塔住佢！」疑犯最後被帶返中區警署調查。
引發「大追捕」，全因兩名美國天后LadyGaGa的忠實粉絲Tommy（22歲）和Eric（23歲），得知GaGa來港開show後，想盡辦法撲飛，但始終買不到票。
2月初他們在尖沙嘴打籃球時認識一名姓苗男子（洋名Taio），火速成為朋友，「Taio打波好叻，之後都有約出嚟打波。佢講嘢好有技巧，令我哋覺得佢唔係壞人。」2月尾時，Taio得知Tommy等人買不到GaGa飛，開始「行動」。
曾藉詞投資借兩萬元
「佢話用$2,000就可買到最貴嘅$1,580門票，當時炒價超過兩萬，我哋當然應承啦，合共過咗三萬元畀佢。」Tommy表示，其後各人亦有相約打波，並沒察覺Taio有問題，直至Taio以投資為名向Tommy借兩萬多元時，眾人開始覺得不對勁，「3月初一次打完波後，我哋問佢如果攞唔到飛，不如退款，佢話稍後會過數畀我哋，點知佢之後不但唔聽電話，仲停用facebook，好彩我冇借錢畀佢。」
為了追討款項，Tommy等人不斷發短訊給Taio，直至上月8日，更向Taio作出最後通牒，「我哋話畀多10日時間佢，如果佢再唔退款就報警。」怎料Taio回覆說會告他們誹謗。各人忍無可忍，終在上月19日報警，「最離譜係同日我哋發現佢改名開一個新嘅fb，繼續話有LadyGaGa嘅飛賣。對呢種人唔可以心軟，否則會有更多人受害。」