梁振英上京見領導人，胡溫對佢訓話一番，如校長訓導學生。梁先生見溫家寶，雙腳蹺起，不似曾先生上京見大人咁樣正襟危坐，顯然輕鬆好多，現場內，照鏡頭所見，只有掌控金融決策大權之副總理王岐山係蹺腳嘅啫，唔知係唔係有高人提醒不要輕佻噃，第二日見胡總，梁先生唔再蹺腳咯。
兩位領導人嘅官腔主要係團結，消弭分歧，顯示北京亦知道本地建制派嚴重分裂，必須修補。胡總仲有四個字講得幾有意思，就係要梁生「繼往開來」，咦，乜咁熟口面嘅？一位先生指點左丁山：「去年曾特首嘅施政報告主題就係『繼往開來』呀！」咁講法，唔通胡總提醒新特首不要忘記過去？曾特首之最後一份施政報告出台之時，曾被批評為計劃多，須長期執行，不知下任特首會否照辦，唔，梁先生競選時猛講「穩中求變」，如果上任後要繼往開來，執曾先生手尾嘅話，未來五年怎麼樣去變？要考佢嘅政治智慧咯。
如何落實團結穩定，亦都幾考人。據一些消息人士講，現任司局長之中，最篤定留任嘅一定係蘇錦樑，因劉吳惠蘭辭職，佢臨急受命為局長，本是署理性質，點知因為梁生當選，佢又係民建聯中人，工商局非佢莫屬，留任機率係百分之一百咁話，曾德成局長當然亦如此；林公公忠心耿耿，任勞任怨，肯做人肉錄音機，留任做政務司司長，機率會有九成，佢最大弱點係民望低，但民望高之林鄭月娥點會得到中央嘅信任呀？雖然張震遠大讚特讚林鄭，希望林鄭留在政府，據講係出口術啫喎。劉夢熊講特赦僭建講得咁大聲，即係逼林鄭離開啫。
為咗團結穩定，相信大部份曾先生舊電池會受挽留，據講唔會再做者有俞宗怡、鄭汝樺、李少光、黃仁龍、梁卓偉及有病在身之孫明揚，空缺可供梁營支持者爭一爭。
未來特首在北京忙碌，日後忙於組班之際，現任特首就去咗南半球訪問雲遊，推銷香港人民幣業務，正是英文所謂killingtime或做緊boondoggle，希望拖到夠鐘。至於敗選特首候選人唐生就與太太在巴黎享受悠閒，學李純恩話齋，其實更加寫意。