麗悅酒店（2266）半年度業績已經靚爆鏡，之後嘅營運數據又靚仔，BUY。麗悅2012年半年度（9月底止）核心純利幾乎翻近一番到9400萬銀，已經相當唔錯。半年結打後，麗悅公佈嘅第三季營運數據，香江酒店平均房租有過20%增幅。莫忘記，緊接落嚟，又係春節檔期，照睇，麗悅下半年度繼續GoodFit，再加埋之前出售酒店溢利3.7億銀入賬，張年度成績表，應該好靚仔。麗悅2012年度純利係咁意上到6億銀，PE由家陣雙位數，跌到得番4倍幾。再講，麗悅家陣息率上到4厘幾，有好成績，加埋上邊出售酒店，有一次性收益，博集團有甜品派送，息率回報應該仲吸引。唔大貪，博麗悅上番6倍PE，現價（1.37元）都要升近三成到1.8元。
慶鈴價平派息高
慶鈴（1122）手頭淨現金高達51億港銀，每股淨現金2.1元，貼近現價（2.3元），係超級現金牛。又集團呢幾年業績一路有增長，兼提高派息，家陣嘅息率高達6厘，亦係無花假。但集團現價，仲係有高達35%嘅NAV折讓，相對同業平咗幾截。呢轉短打慶鈴，博升20%到2.8元，真係未有耐上到NAV。
錢雋