英超季尾，大體上都算塵埃落定，實在按捺不住，都要講幾句。回想季初，睇住阿仙奴的開季成績衰到冇譜時，曾經一度因為傷心、神經衰弱、失眠而罷睇幾場，後來另捧升班馬諾域治，轉移視線為求止血療傷，好不容易捱到季尾，勢色稍對才鬆出一口氣，否則打死都不肯再談。
現時前5位置順序為：曼聯（上屆成績1）、曼城（3）、阿仙奴（4）、熱刺（5）及紐卡素（12）。如無意外，終極成績都不離此局，要讚的是紐卡素，表現突飛猛進，上屆亞軍車路士若果維持現時成績會以第6名完成賽事，換領隊搞到隊波走樣定係班波已經老得滯，見仁見智，反而班主阿巴莫域治過分插手，過份話事，就係路人皆見，除非今屆成為歐聯盟主，否則來屆冇份踢也是自己攞嚟！
唯一稍有差池只係榜首曼聯30號作客同市宿敵兼今屆爭標唯一對手曼城，會否繼季初對賽，主場輸1:6之後再輸多場？饒是如此，曼聯料還有2分的領先優勢，以費格遜的級數，文仙尼根本唔夠班挑戰，如是者，曼聯最後衞冕成功，而曼城則望門輕嘆，再度與聯賽錦標失諸交臂，哈哈，那就真係大快人心了！
我不是曼市雙雄任何一隊的支持者，只是相比下，曼城領隊文仙尼冇料到，一班球員一個比一個無品，先是泰維斯，跟住的巴洛迪利，再加上將相不和，隊波好難撐足全季，曾經領先曼聯多分，現時落後，你話佢哋有幾爭氣？根本就係輸自己，論抵死，比車仔更甚！
稍叫我安慰的是阿仙奴自開季在谷底徘徊後來個鯉魚翻身，幾經掙扎才爬到現時的第3位，能保住明年繼續出戰歐聯，已經額手稱慶，想不到的是隊長尹佩斯目前竟然以27球領先射手榜，還平了一個有趣記錄，一季對賽19隊球隊，在17隊波身上都取得入球。
誰會相信兵工廠全季都在踢逆境波，竟然踢得不俗，叫支持者破涕為笑，呢鋪都算代表作了！
文：盧覓雪