球季鬥入最後直路，做住替工嘅車路士領隊迪馬堤奧前面有三條路，其實無謂多想，明天領軍喺溫布萊盃仔拔完「刺」，先返主場等招呼「地上最強」。
對住班主阿巴，少年得志剛烈嘅波帥眾叛親離，終被撤職，換上曾當英超西布朗波士嘅迪馬堤奧，冇乜人睇好。但每隊波文化唔同，喺阿仙奴，雲格會同班仔曉以大義，同佢哋講肯努力前路會多美好；但喺富豪球會車仔，跟住個強勢獨大嘅老闆，冇人敢說將來。
迪馬堤奧領隊生涯早受挫折，棱角磨滑，同班球會大哥反而有偈傾；隊內士氣漸復，戰績亦回來，領車11戰8勝，手下敗將包括賓菲加同拿玻里，至今仍叫三飛（足總盃、歐聯同來屆歐聯席位）。老細足球下，來季能否坐正控制不了，但整靚自己個CV（履歷表）幾時都有着數。
車仔鬥熱刺呢場足總盃4強，足智彩開出平手盤，小弟認為較今晚兩神經刀利記鬥愛華頓更值推敲。車仔開出[+1]，表面上，莊家畀貼士大家，呢班波會喺今場留力，等下周三主場鬥巴塞嘅歐聯時發難；但足球比賽睇自己也要睇對手，熱刺自從喺2月尾畀阿仙奴5:2打殘後，真的殘了，繼後9場波3勝3和3負，贏嘅對手係史提芬納治、保頓同史雲斯，計賽績極肉酸。
論場上表現，門將費度同中堅京治，老退甚速、中場莫迪歷，小弟向來認為過譽非一線球員、雲達華治傷痕纍纍，去到季尾再難苛求、艾迪巴約同沙夏一個借一個短約，心意難測；打來打去都係隻「馬騮仔」加里夫巴利，老列納將佢舞來舞去，都未定最佳位置。車仔中前場調動人腳較多，門將較穩，對賽從不輸蝕熱刺，季尾士氣勝一切，贏到殺入決賽，對鬥巴塞更有幫助。平手盤，捧車仔安心。
今周其餘心水兩場都係聯賽4哥，分別係荷甲飛燕諾同英冠伯明翰。兩者目標清晰，鬥魚腩精英隊嘅飛燕諾望爭2哥，踢到來屆歐聯；周中小休後啞火與洛達交白卷後，夠磨利刀大炒精英隊，可攻大炒波膽同總入球。伯明翰上周被主隊韋斯咸逼和3:3極精采，延續季尾勁勢，今場殺低下游布城，可提早穩得升班附加賽一席，只慮下周中英冠開快車未必大炒，所以不放上本欄貼士，但穩W可期。
下次見報（22/4）
蘋果波神
今日重心推介
熱選
車路士(平)
冷選
飛燕諾[6球](8)、[7+](8)