現時PSVita護航作出得七七八八，以為悶住過暑假，好彩重量級作品《機戰Z：再世篇》喺PSP登場，好多機迷棄用舊機玩UMD碟，索性喺新機PSV下載新Game，唔使Load碟兼有令畫面靚一倍以上嘅倍線功能！新系統部份角色仲可以唱歌擊退敵人，絕對刁鑽同搞嘢！
記者：許福合
唱歌加輔助效果
每次有機戰作品推出，玩家最關注都係有咩新機體用，《再世篇》在故事到機體都係承接上集《破界篇》，除原有機體外，加上包括鐵人28號、超時空要塞的Dynamite7及高達00第二季等作品，機體多達40部！
另外，隨住新機體加入，亦有新系統配搭，當中最搞笑必定是《超時空要塞Dynamite7》，主角巴沙拿在戰鬥時不會使用武器攻擊，反而異想天開地以歌聲發揮效果，選擇不同歌曲會有不同效果，如回復HP、增加氣力及能力值等輔助，若敵人是出名皮厚打唔入嘅次元獸，便可先降低對方氣力繼而做成較大傷害。鐵人28號獨有的V系統亦好特別，能無視敵方的能力減半等特殊負面效果，令鐵人28號更加橫行無忌。
靠Bug狂加錢
玩《機戰》最愁係莫財，改機升呢全部講錢，好彩有玩家發現狂加資金嘅Bug。方法簡單，在標題頁下選Start按○進入，再用×退出，進入遊戲就會多出50萬，並且可以連續按○及×不斷提高資金。雖然變成暴發戶係好過癮，不過破壞咗遊戲平衡，徒然浪費了一款大作。
《再世篇》跟上集一樣是PSP版，不過新機PSVita都可透過日本SEN賬戶，購買《再世篇》下載版，自行「移植」至PSV度玩。雖然下載版售價超過700蚊，不過一班玩完上集《破界篇》嘅機迷，見到倍線效果靚成咁，相信都好難忍手。不過要提醒大家兩點，首先係用行機PSV上日本SEN下載，需格式化主機再用日本賬戶登入，頗麻煩；另外上集買番嚟嗰一、二集收藏盒，會變得無用武之地。
《第2次超級機械人大戰Z：再世篇》
機種：PSP
類型：戰略模擬
人數：1人
廠商：BANPRESTO
售價：UMD碟約$690
