真係百年一遇！講嘅係星期二晚銀牌大戰，南華以80:77險勝永倫嘅比賽。場波戰況扣人心弦，尤其係最後3分鐘你來我往，結果激到燈都熄埋，擾攘一輪先開得番；之後兩隊又要熱過身，再打埋餘下3分幾鐘嘅比賽。完場已經係深夜11點50分，真係苦了等戰果嘅記者。
打到咁夜，南華迷一樣咁興奮；賽後捉住班球星影相，最受歡迎嘅就係噚日入樽入到成個場嗌晒嘅中鋒留棟梁（圖右）；唔少女fans同佢合照都擺出呢個超人死光手勢，而棟梁就解釋話呢個L手勢只係代表佢個姓（Lau）喎。
南華球員之後齊齊打邊爐慶功，仲收到班主洪生嘅利是。更盡興嘅有肥宏，佢因為腳傷要睇醫生，留到今日先走，不過噚晚就俾有嚟打氣嘅「陳七」同足球隊成員屈咗佢請打邊爐，實行擦餐飽先上機返南韓繼續學業。