呢排好多人問起隻西藏5100（1115），海迪忍唔住都想插句嘴。這隻自稱係「國產Evian」嘅礦泉水，舊年盈利爆升兩倍幾去到3.7億元（人民幣．下同），但係呢啲錢可以話係未落袋㗎！因為佢應收賬同期都升咗四倍去到3.56億，幾咁離譜。
海迪收到風，呢筆錢其實幾乎係來自同一個客仔，就係中鐵快運。咁何解連阿爺都要拖西藏水數？聞說係因為舊年7月高鐵炒車單嘢，對鐵道部嘅人事、管理產生極大影響；呢啲政治因素，對於有62%收入是來自中鐵嘅西藏水嚟講，絕對不容忽視。
海迪唔敢講鐵道部會爭人錢唔還，令西藏水呢筆數變爛賬；但吓吓郁啲就拖數，風險係咩，大家可自行判斷。舊年大陸要慶祝西藏解放60周年，西藏水自然搞得好好睇睇。但海迪想提醒各位，中鐵嘅合約2013年就完㗎喇，鐵道部經過整頓後，仲會唔會咁大使，繼續向「國產Evian」買水向乘客贈飲呢？西藏水大股東王堅，喺公司公佈業績爆升兼禁售期一過就即刻把握機會配股，賣咗8%股份，套現3.5億元。你覺得有咩啟示？
海迪