汽車界早年發明了倒車感應器，當駕駛者入後波倒車，感應器會自動探測距離，遇到障礙物就會發出聲響，距離越近，聲響頻率就越密，已對泊車有很大幫助。至於近代的泊車鏡頭配備作用又有多大呢？今日找來靚女Rika試吓，有同無鏡頭泊車會有咩分別？
撰文：梓濬
攝影：陳盛臣
鳴謝：皇冠車行
查詢：KOFUAutoPartsCo.（23368931）
倒車感應器呢項設備幫助咗唔少有泊車恐懼症的駕駛者，可以因應聲響而泊車。不過，好多時感應器即使發出危險聲響，落車一睇卻發現同障礙物其實有一段距離，所以感應器只不過係輔助的一部份。假如有個鏡頭可以將倒車時的車後視野，透過中控台螢光幕顯示當然會更好啦，加埋轉向角度指示就更加妙不可言。這類泊車鏡頭更逐漸成為現代新車的標準設備，為咗了解鏡頭對倒車泊位時究竟有幾大幫助，我哋搵咗一位有車牌的Model，試試於有鏡頭同無鏡頭的情況下，泊一部中型行政級房車入俗稱S形的車位，時間上有沒有分別。
適應鏡頭 藍線引路
挑戰者Rika於加拿大已經有車牌多年，返香港後間中開朋友車，提到香港地泊車，Rika話香港車位窄，個個都習慣用車尾入位，所以要有好技術及判斷力。俾佢試泊的是豐田CamryHybrid，車長約4.8米，闊約1.8米，要以平衡方式泊入S位亦唔易。先將鏡頭遮住，結果Rika用咗約27秒完成泊車過程；之後用鏡頭輔助再試泊，由於未適應屏幕上顯示的框架線位指示，起初需要21秒，較無鏡頭快了6秒；及後掌握了藍線會隨着軚環轉向角度而變化，而紅線則是臨危界，Rika表現更有信心，一手軚把車泊入車位裏，角度準確，最後成功造出12.8秒的好成績，足足快了一倍以上！
測試一：無鏡頭泊車
需時27秒
把鏡頭遮着，Rika首次泊車便把後方障礙物撞上了。
測試二：有鏡頭泊車
需時12.8秒
有了泊車鏡頭的配合，Rika無論入位角度、扭軚時間明顯準確得多，最後以破紀錄12.8秒完成整個泊車過程。
加裝鏡頭由千餘元起
雖然泊車cam現已很流行，但有許多平價新車仍未有原裝提供，亦有部份舊車車主希望加裝此系統。所以一般汽車零件公司都會有後加鏡頭供車主們選購加裝，最便宜的售價由千餘元起，只不過功能方面就很有限，要跟原裝車廠一樣有藍線式角度變化提示，售價動輒數千甚至接近萬元。
Rika玩後感：
「泊車cam對倒車泊位的確有很大幫助，尤其係對距離和角度有恐懼嘅司機，又或者對身形嬌小嘅女仔，我有一些細粒啲嘅朋友，她們揸車睇位都較困難，泊車cam可以大大減少泊車時嘅壓力，所以，我日後喺香港買車的話，一定會要求加裝呢項設備。」
