企業要追上市場潮流，不斷改造自己嚟適應市場，方可避免淘汰，否則百年老店柯達就係最佳例子，幾代菲林霸王就係死在自己發明嘅數碼相機手下；通用汽車曾是世界汽車大哥大，幾年前咪死過翻生，全靠各國政府打救咋。
我地香港係服務型經濟，寫字樓與商場、地舖就係我地嘅二十一世紀工廠，提供就業嘅地方，但正如林奮強班人嘅研究指出，香港特區政府在回歸後十五年來，不提供土地供興建另一個IFC及另一個又一城，最新一個ICC已係九年前落成㗎嘞，咁搞法，甲級設施供應絕對不足，租金有乜辦法唔貴，五星酒店租金有乜辦法唔升？
今次到曼谷，例牌行商場，SiamParagon仍是首選，人流四方八面而來，令呢間高級商場舖位十分搶手，LV本在四面佛對面有旗艦店，亦不得不追上潮流，在Paragon與BTS（SkyTrain）交接樓面租地方，不日開張。泰國人鍾意食，每個大商場都有個foodcourt，客人要去買「餐券」或買一張電腦卡付款，非常方便。點解香港大商場冇咁大型嘅foodcourt呢？無他者，香港商場太貴租，邊會肯將全層地下或全層頂樓用作「食物坊」呀。
一位泰國資深醫生朋友月前出任為InstituteofArtificialLimbs嘅所長，與左丁山吃晚飯時講起：「最新蒲點係Terminal21，開張只有幾個月，不妨去遊覽吓。」醫生既然咁講，第二日中午立即去，商場就在BTS嘅素坤逸路Ashok站，車站與喜來登與Westin兩大五星酒店連接，好易到，原來呢度就係泰國A嘅寫字樓嘅斜對面，一call泰國A，佢就在商場等候，泰國A問：「乜你都識嚟呢度嘅？」佢首先帶我地到五樓「食物坊」，嘩，價錢係Paragon一半，竟然有35銖（港幣九元）嘅海南雞飯，25銖嘅魚蛋米，乜平到咁呀，泰國A話新商場開張期間做推廣啫，因為便宜，大量年青人湧到，成間商場以機場客運大樓為概念，每層樓以一個大城市嘅色彩為設計主題，例如四樓係倫敦，就有雙層巴士、倫敦地鐵等等，有一層專係租俾泰國本土設計師/本地品牌。唉，曼谷勝在地方多，新商場不斷湧現，創意十足，香港想仿效都冇辦法。