咩叫入波易過食生菜？美斯就係例子，喺周二巴塞隆拿4:0大勝基菲達場西甲，佢係咁意入一粒，並交出兩個助攻，唔單止幫巴塞拉近同皇家馬德里嘅積分差距，自己喺射手榜又拉開基斯坦奴朗拿度（C朗），今季攞齊3大神射手獎，一啲都唔奇。
美斯呢排入球真係停不了，喺之前12場有份參與嘅比賽，入咗23球。不過就算喺西甲神射手同C朗鬥生鬥死，美斯今場都有慷慨一面；13分鐘就助攻畀阿歷斯山齊士先開紀錄。44分鐘，美斯接應恩尼斯達回傳，禁區頂撞射入網，入波原來就係咁簡單。下半場，阿歷斯山齊士同柏度洛迪古斯各建一功，巴塞清風送爽大炒對手4蛋。
暫入61球破巴塞紀錄
美斯今季總入球已經達61球，打破咗球隊紀錄，仲喺3個神射手獎都有優勢。西甲方面，美斯以39球領先C朗兩球（未計周三戰果）。以聯賽入球乘以聯賽系數去定排名嘅歐洲金靴獎，亦都係美斯同C朗單打獨鬥嘅局面；西甲系數係2，所以美斯現時有78分，C朗74分，而第3位嘅阿仙奴前鋒尹佩斯就只得26球，同樣乘2有52分，足足落後26分，我求大俠大膽講句，邊個係西甲神射手，歐洲金靴獎都可以攞埋。另外，美斯已經連續3屆攞歐聯神射手，今屆機會亦好高，比第2位嘅拜仁前鋒馬里奧高美斯多3球。
艾比度肝移植手術成功
巴塞周二喺魯營球場亦有感人場面；打到22分鐘，全場球迷起身鼓掌，為同日接受肝臟移植手術嘅22號後衞艾比度打氣。艾比度同捐肝畀佢嘅堂兄，由下午3時開始做手術到晚上12時；好彩手術都算成功。教練哥迪奧拿都好感動咁講：「今場波我哋將勝利獻畀艾比度同佢堂兄，佢哋先係真正勇士。」
西甲：39球
挑戰者：基斯坦奴朗拿度37球
歐洲金靴獎：78分
挑戰者：基斯坦奴朗拿度74分
歐聯：14球
挑戰者：馬里奧高美斯14球