其實知道好多盛女的胃口都唔大，在家中對住電腦漫畫，最方便就係煮公仔麪食，加上屋企的廚房細細，所以最啱就用啲同樣體積細細的煮食用具！
記者：陳家蕊
攝影：蔡家輝
Model：Angelina@PureModels
場地提供：Lehion（25303099）
迷你獨食鍋
香港好多後生輩都無錢買樓，無經濟能力但又想搬出嚟獨立？劏房暫時係唯一選擇！小記朋友就住在一間百多呎劏房，所謂的廚房，倒不如說只是將一個煮食爐放在房中，所以煮食工具體積，真的不得不小！
在一向可找到很多日式用品的超級市場city'super，就有很多長度都不超過20cm的鍋具，專給獨居生活、須自個兒煮食的都市人用，而且價格相當物超所值！當中要介紹，最抵莫過於一套兩件的MiniPotandPan（$178），只有14cm直徑的迷你煮食鍋與Pan，體積細細加上橙色的外表，彷如小朋友玩煮飯仔的玩具，14cm的煎鍋絕對可以一次過煎隻蛋，而煮食鍋則剛好可以放下一個公仔麪，其注滿的水量也剛好是1L，方便一眾盛女們，連煮個公仔麪的落水份量也不用多想，起碼不會煲了太多水而浪費。
另外，坊間還出了很多只可以煎一隻蛋的煎鍋，除可確保你隻蛋一定煎成圓形唔樣衰外，用來煎其他食物其實亦得，最緊要係體積夠細易收納！
食唔晒 最啱叮
一個人住除咗少煮食之外，好多時仲會有食唔晒嘅問題；食唔晒的食物，慳家啲可以放入雪櫃，第二餐再用微波爐叮番熱再食；次次用保鮮紙包裹？煩人之餘又唔環保！不如一次過放入密實保鮮袋，喺雪櫃一拎出來就叮得！
講緊當然唔係「一般膠」的保鮮袋！西班牙品牌Lekue就出了一個入得微波爐同雪櫃的保鮮袋，佢用100%高級耐熱矽膠所製，耐熱溫度達攝氏220度，耐冷亦可去到攝氏-60度。各位懶鬼，食唔晒嘅、就咁倒入去，一拉就密封，成件事真係夠晒方便！
另外，Lekue亦有出微波爐煮食膠盒，食物放在裏面，就咁用微波爐同焗爐，就可以做出蒸、燜，焗的效果，仲使鬼要咁大個廚房咩！重點係佢體積就好似一個碗飯咁大，唔驚食唔晒！唔怪之得，可以榮登日本「年度三十大暢銷商品」的第十二位！
好玩餐具 抗孤獨
一個人食嘢，有時候都咪話唔悶！所以用一啲得意的餐具，獨食都無咁苦悶，好似由荷蘭設計師WendyBoudewijns所設計的拼圖餐盤，把餐具變成可愛的拼圖，原先針對小朋友去設計，但係鮮色的玩味設計，同樣吸引大人，而且一盤已經有齊食飯所需工具，最啱一個人家中獨食所用！
另外，屢獲設計獎項的英國設計師RichardJoseph及其雙胞兄弟AntonyJoseph，佢哋所設計的雙層碗碟，就相當富現代感，而且雙層設計，上面係碟，下面係碗，絕對慳位，屋企無廚櫃就咁擺都可以當裝飾！
a.city'super（23758222）
b.生活館（31700222）
c.LeCreuset（27901808）
d.K11DesignStore（31105898）
e.Lost&Found（29978191）