放咗咁多日假，大家可能走漏咗籃球之神佐敦（MJ）告內地運動企業喬丹（同佐敦嘅內地譯音「撞名」）嘅進展。講明告人唔係為咗錢嘅MJ，終於拋咗個銀碼出嚟，原來只係區區5,000萬人仔，連座向好啲嘅君臨天下都買唔到。爆出呢個索償額嘅內地《證券時報》話，可能呢單案件較為敏感，雙方代表都守口如瓶，佢哋都係通過一啲特別途徑先知個金額咋。喬丹公關同《證》記者講，雖然佢哋係被告，但就唔係咁清楚個賠償數目咁話。
代表MJ嘅律師就用書面回覆，冇話個金額堅定流，只係重申入稟係因為喬丹嘅行為對MJ個人利益造成損害，第時就算贏咗官司，筆錢全部都會用嚟發展中國嘅籃球事業嘅。華華唔擔心佐敦食言，只係怕若果告得入，Nike（內地譯名耐克）又會唔會告啲乜克物克呢？