近期好Hit嘅PSV遊戲《重力異世界》，將大廈外牆、橋底統統「反轉」變成地面，煲爆機後令我發夢都懷疑自己置身無重狀態。原來現實世界都係咁奇幻，一堆玩具同樣無視地心吸力，好似擒牆跑嘅遙控車、圍住人飛嘅仙子、懸浮相架等，令我恍如愛麗絲置身仙境咁Fantasy！
記者：陳國輝
攝影：楊錦文
Model：Anladia@GME淘女郎
飛簷走壁全靠吸得勁
「嚇鬼咩？遙控車都識得爬牆，仲曉轉彎？」你無眼花，事關呢架AirHogs係以反地心吸力為賣點，有別一般遙控車淨識地面行，AirHogs就配搭一個槍形遙控器，一按掣槍嘴射出紅色光束，遙控車就會追住光束投射嘅位置走動，就算90°垂直牆身，一樣好似小狗追波波咁走嚟走去，超Funny！由於齋以紅光便可控制佢走位，所以單手就玩到，方向感幾差都可樂在其中。
能夠神奇地在牆身走動，全靠參考自F1賽車採用過嘅技術，將類似吸塵機裝置放喺車底，抽走空氣以達至接近真空嘅吸力效果。概念好特別，但真空吸力非常耗電，充電10分鐘大概只玩到一分鐘，想試佢嘅反地心吸力真係要夠耐性。
飛天仙子掌上飄
唔鍾意男仔頭玩意，撲蝶又如何？呢款同樣玩反地心吸力嘅玩意，頭頂裝上螺旋槳，㩒個掣就會向上升高，最有趣係腳部裝咗感應器，當偵測到下方有物件，飛天仙子便會向上爬升，雖然無得遙控方向，不過望住佢圍喺你身邊飄下飄下，隔空「托下佢」又會升高，絕對係兩口子嘻戲恩物。
好玩反地心玩意
心形懸浮相架
雖然電腦、手機已經取代傳統相簿和相架嘅位置，但以電流產生嘅懸浮技術為賣點，又真係罕見！只需接通電源，就能令心形相架浮於半空，而且可不斷旋轉，最啱送畀另一半。
熱玩！iPhone直升機
好多遙控直升機都用紅外線Remote控制機身自轉、急降等動作，但呢款iPhone直升機則透過藍芽接駁，還利用重力技術，以手勢控制機身傾斜和轉彎，加埋LED射燈和起動引擎音效，好逼真！
金翅平衡鳥
咪以為呢隻鳥真係識飛！實情佢採用物理學上嘅平衡原理，小鳥嘴部就係平衡支點，無論你用手指、鼻尖抑或身體任何部份，只要同支點有接觸，就出現呢種擬似小鳥識飛嘅動作，好神奇。
查詢：
（a）JCShop（31022783）
（b） http://www.amazon.com/Balancing-Bird-Center-Gravity-Physics/dp/B0019LNESE/ref=pd_sim_t_2
（c） http://cnn.cn/shop/anti-gravity-levitating-photo-frame-p-4473.html