日本國家隊隊長長谷部誠喺今季德甲俾後輩香川真司搶晒風頭，不過近排就贏番一仗，事關佢早前同日本人氣漫畫主角戴志偉（大空翼），齊齊拍咗個檸檬飲品廣告嘅「隊長篇」，而且仲要搭晒膊頭，不知幾咁老友。
現年28歲、可踢中場或者右閘嘅長谷部誠喺08年1月由日聯浦和紅鑽加盟禾夫斯堡，唔經唔覺喺德甲打滾咗4年幾。而佢都算厲害，效力禾堡第2季就幫球隊贏咗聯賽錦標，仲成為繼名宿奧寺康彥之後，第2個贏到德甲嘅日本球員。可惜佢隊波呢幾季嘅戰績麻麻，仲差啲搞到降班，連帶佢嘅表現亦受到影響，仲俾喺上季幫多蒙特贏咗德甲冠軍嘅小師弟香川真司搶晒風頭。
長谷部誠近呢一、兩季嘅表現，的確冇香川真司咁sharp，但佢始終係日本國家隊隊長，所以喺日本國內仍然人氣高企。正因為咁，先排佢俾某大啤酒同埋飲品生產商邀請同日本長青漫畫《足球小將》嘅主角戴志偉，一齊拍攝一個成人檸檬飲品嘅廣告。
作者高橋陽一：好開心
喺廣告入面，長谷部誠仲要同戴志偉有交流，從對方手上接過藍武士嘅隊長臂章後，再將嗰塊黃色帶戴上手。至於有乜寓意言？我求大俠相信，係戴志偉要長谷部誠帶領日本國家隊，衝擊2014年巴西世盃決賽周。而《足球小將》嘅作者高橋陽一話：「我真係好開心見到日本國腳可以同自己創作嘅漫畫人物有交流。而且，仲係兩個日本國家隊隊長㖭（戴志偉喺《足球小將》入面係日本國家隊隊長）！」呢個咁有創意同埋意思嘅廣告喺噚日正式出街，喜歡日本隊嘅球迷不妨上網睇吓嘞！