櫻花國地震一年，華華好多朋友已經忍唔住，趁復活節假「返鄉下」感受一下和風氣息。金融管理局前總裁任志剛都唔例外，華華八到，任總兩公婆上個禮拜搭國泰去名古屋賞花，入住萬豪，認真識嘆。任總上個月喺特首選戰中，跟住唐唐碌嚟碌去，出心出力，當然要休息一吓，叉叉電啦！
名古屋花開燦爛
任總唔只係聯滙高手，原來連揀賞櫻嘅時間都超準，點解咁講？事關名古屋一帶呢排櫻花開得特別燦爛，賞花就最啱啦。朋友話畀華華聽，見到今年六十有五嘅任總，貫徹其頂天立地、有腰骨嘅性格，孭住個黃色背囊上機，成個學生仔咁款，之但係擁有一頭有型濃密白髮嘅任總，相信大家都好難唔認得佢。
前日上京接旨嘅候任行政長官梁振英，唔知係咪為咗慳錢畀曾蔭權睇，要老婆同佢一齊焗坐商務倉。但曾經喺金管局年薪過千萬嘅任總，一於話之你，無官一身輕嘅佢，鍾意坐頭等就坐頭等，唔使做騷兼避忌咁多，話晒度假，當然要疏乎吓啦。只見家梁振英未上場已經要急救民望，華華建議呢位未來特首，下次不如轉戰經濟倉，同市民坐埋同一款凳握握手，咁先係親民吖嘛。
李華華
mailto:[email protected]