英超大局已定，曼聯領先曼城八分，已攞住一隻盃耳。曼聯今屆飽受傷兵困擾，連後防大將維迪未到季中已因傷收工，又怎會估到曼聯有力後來居上，入直路後將億萬大軍曼城拋離，維迪認為全靠領隊費格遜。薑越老越辣，你又點估到兩老傑斯及史高斯仍在為費Sir死拼。曼聯就是有這種團隊精神，要先成為曼聯人，才可成為球星。這點在曼城身上就差得遠，巴洛迪利、泰維斯等性格巨星，單打獨鬥，逐件秤都比曼聯前鋒韋碧克、華倫西亞好波，但加起來，曼聯就有整體作戰優勢。
曼聯費Sir的絕對權威
當特區人人嗌口號，講大團結大和解時，人人亂噏當秘笈。費Sir之成功團結曼聯上上下下，首先佢有絕對領導權威；任何天皇巨星都冇得同佢拗，前有荷蘭中堅史譚，後有超級球星碧咸，一唔聽話即送走，冇得返轉頭。
但費Sir唔會因球員表現差而輕言放棄，今屆年輕守門員迪基亞起初處理高波欠佳，受球評人及曼聯Fans質疑，但費Sir投以信心一票，迪基亞近三個月神勇表現，令曼聯只有一場敗仗。
振英當選，何來領導權威可言？佢自己攞到支持票只有100票以下，比唐英年200多票小一半，其餘工聯、民建聯、中醫、漁農、區議會、人大政協，全屬中央可調動之鐵票。你話那些中央指揮的鐵票會心甘情願接受他領導？正如車路士老細是俄國油王阿巴莫域治，他會介入球隊管理時，任何領隊一樣冇權威可言。當西班牙王子費托可直接同油王接觸時，前領隊波亞斯便失去了排陣的權威。
振英拉雜成軍的殘局
同樣在維穩前提下，振英不能大換班時，即係冇排陣權力，又點可能踢出佢自己的戰術部署呢？任何變革都要講條件，要有基礎，不是靠把口。
曼聯有一班費Sir死士執行戰術，後防李奧費迪南，中場史高斯、卡域克，前鋒朗尼組成一條脊樑。振英有冇？人係有但冇地位冇權威，點可以發揮臨場指揮作用。煲呔上場，起用曾俊華、鄭汝樺、林鄭、邱騰華組成骨幹團隊，全力推十大基建，先至成功。下屆政府，拉雜成軍後，邊個會係佢骨幹官員，仲要執行一條變革路線？
如此殘局，真係越諗越驚！
添馬男