有超過30年歷史嘅滙豐銀行慈善基金，主席一職向來係滙豐香港主席嘅囊中物，不過獅子行最近打破慣例，搵嚟喺公益界幾有代表性嘅王䓪鳴（Rosanna）做非執行主席。
歐智華唔兼任
點解滙豐香港主席歐智華唔跟傳統呢？華華聽講，歐主席之所以唔做個基金嘅領頭人，皆因佢日理萬機全球四圍飛，留喺香港時間唔算多，比較難兼顧慈善基金工作。其實基金會活動好多時都係由亞太區CEO王冬勝同香港CEO馮婉眉出席。
而Rosanna既係香港滙豐非執董，又身兼多個慈善及福利機構公職多年，負責統籌慈善活動自然得心應手，無形中幫滙豐加多個慈善icon。歐智華將呢啲同慈善界鋪橋搭路嘅功夫交畀Rosanna，自己就可以更加專心做好重振獅子雄風嘅大計啦。