領匯「屠殺」小商戶嘅血債一疋布咁長，近排似乎想洗底，唔知邊位度咗條絕世好橋，舉辦咗個「尋味時光」活動，由DJ小儀同食家紀曉華帶大家去領匯商場「尋找老字號，細味幾代情」。網民踴躍「響應」，搞番個「尋你老味」活動，細數俾領匯逼走嘅老店血淚史。
老字號買少見少
呢兩日網民蜂擁去領匯個活動專頁留言，有人話專頁涉嫌「詐騙」，齊齊向facebook檢舉；亦有人擔心參加活動嘅老字號好快就捱唔住貴租，叫大家快啲幫襯。亦有將軍澳尚德邨嘅小店喺網頁上自誇「有30年經驗製作的煲仔粥」，大佬呀，呢條邨入咗伙14年咋！而以下留言就有過百個like：「我從來未見過如此無恥虛偽的公關工程！租金狂飆把老舖都逼死了，轉個頭來叫人去你領匯商場『尋找老字號』？」
領匯監察成員張文慧近排都有留意領匯商場周圍貼晒尋味海報，覺得好反感。佢話領匯每年都「upgrade」六至七個屋邨市場，乘機加貴租鏟走八、九成小商戶，老字號食店、雜貨店、文具舖買少見少，「街坊一路幫襯開嘅舖頭執晒，已經冇嘢值得回味」。佢話惟今之計都係要政府回購領匯，否則小市民焗住幫襯連鎖店。
領匯發言人話，樂意聆聽大家意見，但係唔會暫停專頁運作。「尋味」活動係想幫小商戶擴闊客源，而商場「upgrade」原來係為咗令家庭式經營小商戶第二代更願意繼承事業。哦！原來領匯係咁用心良苦。
霸權無處不在，油麻地活化廳就由即日起至5月底舉辦展覽，教大家「抗霸權八式」自救。例如唔好嫌遠行多兩步、多啲去小店訂貨等等。活化廳地址係上海街404號地下。
