雖然長假期前偏向短線睇淡港股，但係美國QE3預期冲淡，令內地收水壓力放緩，A股清明過後就係威係勢，至於恒指喺長假期前保持兩支陽燭，雖然噚日現番支陰燭，但短線似乎儲唔夠淡飛，照計未係時候喺未來幾日就直線急插。
羅欣毛利率增 逢低可吸
不過，中線嘅話，晉佳認為投資者始終唔多信內地有條件政策轉向，債重企業依然面對好大壓力，所以保持睇淡。以圖論勢，美股道指啱啱跌穿小三頂頸線，恒指就首次喺小雙頂頸線20521點以下收陰燭，日線圖向淡，不過恒指20100點左右就係舊年10月升市以嚟嘅上升支持線，係關鍵水平，預計跌到20100點，點都識得彈一彈，所以就等恒指反覆多一段時間，先部署造淡，咁樣亦可以避開短線挾淡倉潛在風險。
即使港股嚟緊有個小反彈，低撈然後博升十個八個巴仙派彩嘅機會真係唔容易，惟有留意吓長短皆宜嘅股。其中冷門得嚟又優質嘅羅欣藥業（8058），係值得睇睇。
羅欣藥業本身從事呼吸、消化系統藥品業務，亦有抗生素、心血管藥，算係中高檔一啲，公司未來繼續加大呼吸、消化系統藥品比重，可以避免競爭劇烈嘅低檔藥品市場。舊年藥業股度過艱難嘅一年，因為有限價政策，同時原料藥成本上升，令利潤率大幅下降，唔少藥股舊年盈利大挫，甚至蝕錢，但睇隻羅欣藥業，毛利率由55.9%升到61.6%，純利升11%至4.27億元人民幣，反映限價政策對於羅欣嘅影響唔太大。
單睇第四季，羅欣藥業純利1億元人民幣左右，按年跌大約7%，收入微升3.6%，但盈利相比第三季嘅9600萬元人民幣升些少，相當穩定，嚟緊內地有新嘅醫藥行業扶持政策，可能幫到佢一把。市盈率得7.8倍，估值唔貴。
羅欣股價喺今年1月下旬至3月下旬，喺20日線錄得支持，穩步上揚。如果港股一如晉佳預期，中線表現麻麻嘅話，後市大把機會低吸。
不過，投資者都可以有兩手準備，如果市況好轉，股價突破7蚊阻力就可以吼位吸納，到時上望10倍市盈率，即股價8.5元，理應冇乜難度。
晉佳
本欄逢周一、三及五刊出