曼谷遊客必到嘅商場SiamParagon內有一間大書局，就係「紀伊國屋」，日本零售業在日本國外節節敗退，二十年內，三越、大丸呢啲老牌子已在東南亞不見蹤影，崇光、伊勢丹、東急嘅力量亦大不如前，奇怪嘅係，呢間「紀伊國屋」賣書啫喎，竟可以走出日本，在外開分店，甚為成功，可見得做生意呢回事，事在人為啫。肥仔Ｋ留日三年，有一個觀察，就係日本公司每逢遇到經營困難，就一定會班師勤王，首先撤掉外國分公司、分店，然後死守國內大本營，點知道過去二十三年，日本經濟爆破以來，國內消費不足，經營日益困難，反而東南亞、中國就日益興旺，自海外成長市場撤退，回守國內走下坡陣地，就係絕對失敗嘅策略。紀伊國屋逆潮流，走出去，好嘢吖，日本企業近年屢屢敗走麥城，連新力呢啲大名牌都俾韓國公司打到氣咳，不斷改組，最近又推出一個所謂「四螢幕同一策略」（unified"fourscreens"strategy，即手機、平板電腦、電視、手提電腦四大產品），委任首席設計總監管理晒四套產品之設計及包裝，務求爭回市場份額。
日本大公司傳統以技術掛帥，技術工程師升上高位，因過去開發新產品及產品之生產效率，由工程師做領導人CEO，比較適當，但自從「蘋果」以產品設計取勝，「用家方便」打開市場之後，三星緊隨其後，日本公司仍然講求技術，未免過時，畢竟依家用家每一年、每半年都更換新款手機，所謂「耐用」喎，搵人要咩。今次新力搵一位設計師統理手機、平板電腦、手提電腦及電視，想來必以市場動向、用家口味為主，摒棄過往由工程師從「製造」立場出發嘅觀點。
做產品就係要sell，唔sell得就冇鬼用，理得佢係精心製造，保證耐用吖，過去十年，老牌大公司以至新興公司產品飽受打擊，數埋就有摩托羅拉、諾基亞、愛力信、雅虎、惠普、新力等等，可見無論公司曾經幾威猛，一旦追唔上潮流，就會陷入受淘汰嘅下滑循環！