早前有網民發現國際足協（FIFA）網站，將香港官方名稱無端端改為普通話拼音「XianggangTebieXingzhengqu」，仲話香港首都係Victoria（維多利亞），澳門都遇到同樣情況。突然間俾煲冬瓜拼音「惡搞」，網民即呼籲發起一人一信要求「正名」，真係有用喎，國際足協已經將香港改番做「HongKongSpecialAdministrativeRegion」，首都就咁寫返HongKong；澳門嘅英文亦告回復正常。
有高登討論區成員話連續發咗10幾封電郵去國際足協，喺國際社會都發揮到「高登力量」，高呼「我哋贏咗一仗」，唔少人都讚國際足協效率夠快，從善如流，冇因為香港同澳門只係排名158同199而唔做嘢。八方查過，國際奧委會網頁用「HongKong,China」，亞洲足協都叫香港足球總會做「HongKongFootballAssociation」，總之點都唔會用「Xianggang」啦。