近日民企風暴再起，但凡有核數師辭任或者對業績持保留意見嘅，間公司股價重則跌幾十、輕則跌幾個巴仙。咁蹺李超人嘅長實（001）噚日公佈換核數師，德勤將會退任，由羅兵咸接手。長實解釋，鑑於近年適用於集團同附屬嘅和黃（013）嘅會計準則日見繁複，若果同和黃用同一個核數師，可達致核數工作一致性同提升核數服務效率喎。
霍建寧舊年搵1.7億
唔知係咪驚市場敏感，長實噚日特登搞咗個電話會議解畫，據財經網站滙港通訊引述集團副董事總經理兼執行董事葉德銓話，唔擔心兩間公司嘅獨立性同透明度會因此減低，又話集團呢分鐘冇重組計畫。華華只想問，點解唔係和黃委任埋德勤做核數師呢？唔通盤數難計好多？定因為德勤近排辭任咗唔少問題公司嘅核數師，不如先飛甩佢？
講開又講，長和系噚日出年報，舊年和黃董事人工最高嘅當然係大班霍建寧，總酬金升一成至1.7億，長實最高薪係李澤鉅，總酬金5,805萬（加幅15%），兩份工嘅難度明顯有距離噃。