蘋機會：謝安琪萬元耳機　倒模御用

耳機早是Fashion潮物，賣相越嚟越吸引外，仲好似時裝咁玩度身訂做！Sorry，係「度耳」訂做先真，好似靚太天后謝安琪咁，所戴嘅粉紅色UE隔音耳機，不單集六個喇叭單元於一身、售價過萬嘅發燒級耳機，仲係全球僅此一對！全因跟番阿Kay耳形嚟倒模打造，所以Fit晒對耳仔，戴住佢出Show演唱零舍舒服。

撰文：鍾礎鴻　
攝影：周旭文

Kay讚音色有空間感

■阿Kay大讚UE18Pro音色具空間感，唱得特別投入。

阿Kay剛跟Logitech合作了一個音樂會，演唱時就係戴住佢哋最新嘅UE18Pro隔音耳機。呢個系列提供個人化訂做，何韻詩就係粉絲之一，更於耳機印上光明會Logo，就連外國巨星如AirSupply、MariahCarey等都有用UE系列耳機。
阿Kay自09年就開始用UE系列，而作為歌手，佢鍾情邊聽歌邊跑步、做Gym，連打理家頭細務都有耳機相伴，可以話係老公張生以外嘅重要伴侶，要求梗係高啲。「首先音色要平均，高中低音表現要一致先感受到空間感，當音色仔細，唱歌時就唔會用錯力度；另外，佩戴亦要舒服，Size最好夾番耳形，好似UE18Pro咁度耳訂做之餘，跟機仲有五對大細唔同嘅in-ear膠粒，戴起嚟自然舒服好Feel。由於呢類耳機隔音能力高，演出時未必清楚現場觀眾嘅反應，環境調節功能就大派用場，讓我可同時接收到Fans們嘅喝彩聲。」

■UE18Pro約售$10,530，而粉紅耳機加Kay簽名式樣，全港僅此一對。

■Kay話跟番耳形倒模嘅耳機，戴得最舒服。

倒耳模六星期收貨

要訂造一個100%適合自己耳形嘅in-ear耳機，用家需自行搵視聽中心幫手，以矽膠作入耳式倒模，呢個步驟唔使半粒鐘，平至三兩百蚊就有交易。之後，就可以交個耳模畀代理，選擇耳機顏色及設計，咁就OK。代理會將耳模寄去美國Logitech製造，三至六星期就起貨，之後便可上代理收貨及即場試聽。
以Logitech為例，佢哋有兩家代理提供UEPro系列訂做服務，頂級型號分別為四單元之UE11Pro及六單元之UE18Pro。所謂單元係指每隻耳機內含嘅發聲模組，高、中、低音都有個別單元負責輸出不同音頻，簡單講，即係有多個喇叭喺你耳仔邊發聲，數目越多當然聲音層次越高。好似UE18Pro咁，Kay就大讚佢人聲音準好好，音場亦夠闊，低音夠力但不致過份轟炸。呢幾點亦係UE18Pro叫價較高嘅原因。