咪神徐淑敏（Suki）雖然啱啱先再生完個女冇耐，但已經諗定再生：「我媽咪有12個兄弟，我都可以，因為我同老公都好生得！」
已經收晒身嘅Suki，噚日拍住好姐妹沈卓盈幫間嬰兒傢俱店做開幕嘉賓，沈卓盈仲代大會送咗架BB車畀Suki個細女，而Suki亦禮尚往來送番張雙人梳化畀卓盈，仲祝佢快啲搵到另一半。
賺夠錢再生仔
問到成日想生B仔嘅Suki，仲會唔會再追多個？佢即話：「相士話我2014年一係會生仔，一係就賺大錢，所以暫時唞下，遲啲先再生，自己就想賺咗錢先，因為繼續生一定會生到仔！」佢仲話想學婆婆做個多仔婆：「媽咪有12個兄弟，但得佢一個女，我驚會相反，不過自己都可以繼續生！」
為好友做紅娘
除咗忙生仔大計，Suki亦想介紹個好男人畀單身嘅沈卓盈：「我成日都介紹男仔畀佢，10隻手指都數唔晒！不過佢好奄尖，食完一次飯就冇下文！」