特首辦同司局長搬到添馬艦新政府總部後，下亞厘畢道冷清晒，直到3.25特首選舉結束後，先至再好似以前咁車水馬龍，因為梁振英個候任特首辦位於舊政總；要與各界人事「大和解」嘅梁振英，近日陸續約見各路人馬，傳媒惟有全天候留守，非常熱鬧；夕陽政府駐守嘅添馬艦，即時黯然失色。
葉劉架勢波子買餸
獲邀到訪候任特首辦嘅通常都係有頭有面人物，好多人都會揸靚車抵達，八方仲發現，有啲名人嘅車牌好有心思，估唔到平時頗嚴肅嘅政圈中人，原來好幽默搞鬼。
好似梁振英日前會見法律界人士傾雙非問題，其中一位獲邀嘅係港大法律系教授戴耀廷Benny。原來Benny嘅座駕係啡白色MiniCooper，夠晒時尚之餘，個車牌仲別出心裁。驟眼睇落，佢嘅自訂車牌「KN1HT」冇乜特別喎，但細心啲就留意到，其實係將THINK倒轉串，真係估佢唔到！唔知Benny有冇建議梁振英逆向思考，諗吓點樣解決雙非問題呢？
新民黨主席葉劉淑儀都好架勢，人未到，佢架保時捷911CarreraCoupe引擎聲先到。呢架綠色波子有13年車齡，當年葉劉仲揸住波子去坪石邨買餸同恤髮，同佢份人一樣，巴閉之餘又夠搶眼。資深大律師胡漢清都係自駕嚟到，佢揸AudiA6，好大路嘅藍色，屬專業人士之選。
西環吹雞靚車塞路
候任特首辦嘅往來政要權貴絡繹不絕，但盛況始終不及西環。上月底西環吹雞召見唐、梁兩營人馬，叫大家以和為貴，當日幾十部名車魚貫而至，搞到西環大塞車，政協常委戴德豐架勞斯萊斯更泊正喺中聯辦門口，呢啲咪叫氣勢囉！
mailto:[email protected]
