民企風暴搞到人人自危，芬佬朋友話要買返啲坐過夜都「瞓得着」嘅股份。海迪建議佢買旺旺（151），佢即嫌貴。旺旺去年毛利率同經營溢利率表面上都係跌，但如果拆開半年度比較，其實下半年盈利能力已全線觸底回升（例如毛利率上半年是33%，下半年已升到36.2%）。旺旺舊年是在頭九個月分階段來加價，即係影響要到今年先全面體現，就算原材料價企硬唔跌，旺旺利潤率今年都仲有空間上升。
如果只係靠慳，海迪唔會buy。但係旺旺舊年「最大嘅敵人只係佢自己」，因為產能限制搞到唔夠貨賣！公司無增加派息，就係留返啲錢來擴產，目標今年銷售增長20%至25%。負債雖然多咗，但仍然係淨現金狀態，經營現金流和盈利同步上升，咁正路嘅資產負債表，其他劣質民企即刻比下去啦。在加上未出過食品安全問題，大股東蔡衍明又大把銀唔使揼水，所以依家風頭火勢愈見矜貴（今年PE逾27倍），再一次話俾大家聽好嘢真係唔會平㗎囉。