第三屆金堯如新聞自由獎噚日公佈得獎名單，《蘋果》靜態組同事憑「區選、選委選舉種票系列報道」攞到印刷組嘅優異獎，八方喺度恭喜晒佢哋。
翻睇萬計資料 抽絲剝繭
負責報道嘅同事講番，區選過後，喺好多區都發現大批來歷不明嘅票，初頭都冇乜頭緒，但同事金睛火眼，翻睇咗數以萬計嘅選民登記資料，抽絲剝繭，再做足幾百份查冊資料之後，先至逐漸發現到有「1屋7姓13票」等疑似種票單位，再逐家上門查證，先至做到今次嘅偵查報道，踢爆建制派除咗有蛇齋餅糉外，原來仲有瘋狂種票一招。
今屆印刷同電視組嘅大獎就分別由《明報》嘅「烏坎村抗爭事件系列」同有線嘅《上訪》奪得，採訪兩單大陸新聞嘅行家都要諗盡計仔避開國安嘅追捕，好似有線呂秉權負責嘅《上訪》，由於訪民俾當局嚴密監控，每次訪問都要把握國安發現同殺到之前嗰幾分鐘完事，然後迅速走人。
所以呂秉權都感慨咁話，CY落區就帶紙筆同一張凳；記者返大陸採訪，除咗帶紙筆，仲要帶一條心、同一條爛命去博。
八方喺度再次恭喜所有得獎嘅行家，向各位瞓身爭取新聞自由嘅行家致敬！