晚會上碰到大班熟人，有校友苦口婆心叫左丁山做「俊傑」，佢話要俾CY一個機會，一段時間，改善民生，打破官商勾結。唔，CY同商界大亨冇關係咩？李嘉誠唔撐佢啫，大把富豪聽北京話，轉軚抬轎，更有幾位大亨在去年第三季開始，已在背後為CY搖旗吶喊，西方媒介以為佢上馬會打破大亨與官府之cozyrelationship，係知一不知二，難道梁生唔同一啲挺梁大亨好cozy咩，都係鍊乙錚教授講得啱，板塊之爭啫，既已有勝負，板塊利益即將轉移，大家不要天真到以為梁振英全是為了大眾。
俾人勸諭做俊傑之後，見到一位與北京高層有往來嘅知名人物，多口問佢做唔做俊傑，想不到佢竟然如此回答：「有時要堅持己見，俊傑可能只是一時嘅啫。」估唔到佢會咁講，有弦外之音噃。
閒談完畢，返埋座位坐低，抬頭一望，對面枱竟然有好幾位香港大學老鬼，與許仕仁同期，大家飲紅酒傾偈，唔知幾開心，佢地個個識得許仕仁，唔知對呢位落難同學有乜感想。講官位，講威風，許仕仁就曾經威過佢地多多聲嘞，?，人生係長途賽，要睇埋臨尾幾年，晚節難保當然係人生一大悲痛。因新地之事，曾有老友感嘆：「世風日下，過往英國佬唔會咁樣。」
咁又未必，英國人高官過往一定退休回國，過平靜淡薄生活（如衞奕信，更早之郭伯偉），但不代表在港時高官個個循規蹈矩，好幾位前輩都同左丁山講過故事，英國人處事叻在低調，無論在官場或者在大洋行、銀行出事之洋人，皆全在不動聲色下，以健康或私人理由下提早退休回國，或先調派往其他更細小嘅殖民地（相當於貶往邊疆），而且當年香港傳媒十分聽話，報紙受華民政務司召見，已經識做到唔恨呢！
今時唔同往日，政府與財團好難將一啲醜聞冚實或者傳媒聽話識do，故此似乎醜聞特別多，影響香港之國際形象，賓架Y就收到新加坡賓架之取笑電郵「ThiscanonlyhappeninHongKong!」如果係左丁山收到，就會回答「Yeah,becausewehavemorethanonenewspaper!」