雖然《Brutus》係好睇，但近年他們走專題路線，字多圖少，係日本仔至有興趣，跟了十幾年，都係時候講拜拜，估唔到話口未完，春季特厚時裝號封面竟然大字標題「NewPrepStandard」，看來長春藤經歷幾十年演變都係時候作個總結。「Preppy派皮」這個字非今日鮮，但要說明也要前言跟得上後語，洋洋三數千字肯定少不得，我以偏概全譯作「書院Look」，有心者請自行谷歌。老實講，一本雜誌能夠這樣把Prep來個現代版解構事前工夫也真算做足，尤其Icon人辦一欄再不是老祖宗WoodyAllen已經要舒番啖氣，領軍人物換作WesAnderson，69年出生，其導演作品由《癲才家族》到《海海人生》到動畫《狐狸先生無得頂》都係我杯茶，髮型又似足陳冠中，格仔恤衫藍絲絨西裝再襯對ClarksWannabe，你話幾考人着，還要着出書卷氣，就真是百人一遇了。綜觀全書，經典書院仔打扮如Loafer、ButtonDown、Chino、Polo等等如常出現，不過西裝便裝指定動作都是着細一個碼，演變結果原來是向Slim人埋堆，怪不得全書肥人失蹤，你叫我等中年發福如何自處？如何優雅？如何繼承派皮之路？定還是，自行拐彎中途轉走Hip-Hop路線無眼屎乾淨盲？唷！
作者：曾凡（mailto:[email protected]）
逢周一、二刊出