公司生意唔好，打工仔擔心冇花紅分，分分鐘要減薪！柯達員工就唔使驚，因為公司破產都顧住啲夥計，話今年要派1億港紙花紅畀300幾名行政人員同其他員工。
柯達家搞緊破產重組，但仍然擔心員工冇飯開。柯達話，呢班手足全部都係精英中嘅精英，佢哋嘅知識同技術對公司好重要，不過因為佢哋嘅花紅同柯達表現掛鈎，公司唔掂佢哋都冇錢賺，所以雖然做嘢多咗，但人工就減咗。
柯達話，如果呢班員工一個唔覺意俾人撬走咗，到時就喊都無謂，所以申請向呢300幾人派總共1,350萬美金花紅。其中119名中層管理人員會有年薪35%至50%嘅花紅，總數850萬美元；另外近200人就可以得到25%年薪做花紅，總數500萬美元。
不過，柯達會停止向1.6萬個符合醫療保險嘅退休員工提供保健補助福利，取而代之嘅，係成立一個退休委員會審核醫療福利，呢班人就慘咗啲！