中環在線:極度莫財希臘警察有得租 - 李華華

中環在線:極度莫財希臘警察有得租 - 李華華

通常一個人手緊嘅時候,真係乜嘢搵錢嘅方法都諗到出嚟,歐豬國希臘都唔例外。莫財到極點嘅希臘,最近竟然諗到以每小時30歐元嘅價錢,「租」個警察嚟保護你。

搞活動可租巡邏船

希臘負責安全事務嘅公民保護部就話,呢啲出租警察可以執行嘅任務,包括護送危險材料或藝術品等,以前呢啲行動只要申請就費用全免,不過家冇得傾喇。
你以為咁撲水法已經好黐線?仲未!原來出租警察都仲有增值服務,如果你搞個活動,想要巡邏警車出動,每小時加多10歐元就得;出動巡邏船嘅就每小時收200歐元;若果出動直升機就揦脷喇,要收成1500歐元,即係一皮港銀㗎。公民保護部仲話,出租警察嘅收入,將會用嚟改善警察配備同埋基礎設施喎。計我華華話,其實全世界都知你冇錢㗎啦,要撲水咪大方啲囉。