潮媽天后陳慧琳（Kelly）上月底再為人母，為長子蝦餃仔劉昇生下胞弟小龍包劉琛，未坐完月的Kelly前晚已跟老公劉建浩（Alex）及蝦餃仔到九龍灣看騷，囝囝場中high爆跳舞，一家三口歡度開心復活節。Kelly雖化身口罩黨出動仍被認出，產後火速修身的她更主動獻身擋鏡頭，好讓老公抱着囝囝甩身。
現年39歲的陳慧琳，上月21日剖腹誕下次子小龍包劉琛，出院後深居簡出坐月兼湊B，距離滿月尚有兩星期。Kelly前晚按捺不住偷走出街，與老公劉建浩帶着兩歲多長子蝦餃仔劉昇去九龍灣國際展貿中心睇騷，暫時撇下小龍包。Kelly曾聲言坐月會大肆進補，不介意增磅，但現場所見，她已差不多完全修身，身上沒半點贅肉。
半場買定爆谷
Kelly前晚與老公及蝦餃仔欣賞的「TheLittleBigClubLiveinConcert」，為不少小朋友至愛卡通人物真人騷，Kelly一家三口在開場後才低調入場，鬚根look的Alex抱着蝦餃仔，Kelly則戴着口罩，直至入座後，Kelly才脫下口罩唞氣。中場休息時，Kelly再戴回口罩，並偕夫及兒子到場外買爆谷，待下半場時邊看邊吃，蝦餃仔玩得十分開心。直至8時半完騷，心情大靚的蝦餃仔由爸爸抱着離開。
Kelly離場時發現有記者追拍，拿着爆谷桶和綠色旗仔的她主動上前打招呼，主要為引開記者，好讓老公Alex抱着囝囝避開鏡頭先行離開，兩夫婦非常有默契。
雖戴着口罩，但其實Kelly早已被同場的不少家長認出，有媽咪帶着囡囡一直追着她要求合照，親民的Kelly都有求必應，只露出雙眼的Kelly精神奕奕。Kelly更向記者搞笑說：「好啦，影到呢度好唔好呀？你哋唔好搞佢（指Alex及蝦餃仔），搵我啦。」
兒子最愛恐龍
Kelly表示蝦餃仔最愛紫色恐龍Barney，她說：「蝦餃仔好熟佢啲歌，佢喺場中仲睇到跳晒舞，好鬼high。」Kelly企定定影完相後即會合老公及囝囝，昨日她指蝦餃仔睇騷後心情興奮唔肯瞓。
採訪、攝影：楊浩賢、黃文成、羅德光