現年26歲、被喻為史上最年輕世界冠軍嘅日本魔術師加藤陽（圖），噚日應邀出席一個商場活動，向港人呈現神乎其技嘅魔術表演。呢位哥仔又稱「神之手」，手指纖長，靈活自如，八方見佢揸住支魔術短棒，一支變兩支，兩支變三支，拋兩拋又變走唔同顏色嘅頂針，人棒合一，睇到台下觀眾拍爛手掌。
加藤陽到過法國演出，曾勇奪多項國際賽事獎項，更摘下2009年世界魔術聯盟舞台魔術冠軍。今次同台較量，仲有韓國魔術新星KiMoonDo，佢拿手表演魔術帽戲法，配合搞笑嘅八両金頭造型，逗得小朋友鬼咁開心。來自台灣嘅魔術師李昂軒亦唔輸蝕，又玩啤牌又玩領呔，演出層出不窮，為港人復活節假期last一日送上完美歡樂。