八方嘅好鄰居單仁早前預告過，今屆立法會選舉，新界西競爭激烈，就算鄉事派都有陳強同何君堯呢兩條隊互片。最終邊個可以跑出，八方唔係先知，好難估計，但肯定嘅係兩位都不斷招兵買馬。
身兼律師會會長嘅何君堯除咗喺自己盤踞地屯門擸樁腳，亦有喺葵青區「班馬」。佢除咗「羅致」葵青區議會姐級人馬譚惠珍，更拉攏葵青區區議會前主席梁廣昌，原來佢哋早喺新年期間已經拍住喺地區內派揮春同利是封，證明何君堯參選決心好大。
除咗殺入地區，何君堯最近仲同人稱田雞嘅藝人田啟文相遇，仲話對田雞嘅第一部電影《忌廉溝鮮奶》依稀有印象，八方就太後生，只記得《少林足球》囉。不過何君堯咁識做人，唔從政就真係嘥晒啦。