男人揀車就如揀女友，女士揀車的道理亦然。《春嬌與志明》入面，春嬌搞完一大輪，就是想志明為了她改變，可以變得更型更靚仔固然好，能夠變得既溫柔成熟又細心體貼，才是女士們真正所想。新一代GS250跟舊款相比，有齊春嬌夢寐以求的男友好條件，即使曾經分手，都會吸引你立刻翻撻。
記者：許維雅
攝影：陳盛臣
Model：Eagle
動感面貌有型搶鏡
通脹高、車稅貴，雖然近年不少車主都埋怨新車越來越貴，但正所謂一分錢一分貨，要男友條件好，當然要付出多少少代價啦。好似全新第四代LexusGS房車，即使最低門檻級別的GS250Luxury版，新車推廣價都要差不多56萬元，而豪一級的Ultimate版就要差不多65萬元，不過想知男友升價後變成點，借來第三代GS300比拼一下就更加一清二楚。單看外形，GS250的新面貌已經型格不少，設計跟擾流相接的SpindleGrille鬼面罩搶鏡有型，而拉長了頭燈加入箭嘴形LED日間行車燈就令眼神更銳利，加埋新霧燈配合造型立體的擾流來增強跑味，還有經優化的引擎蓋及車側立體骨線、修長外形的側鏡及微微凸起的輪拱等配合，男友直頭好似畀形象指導完全執過一樣，踢走以前的斯文薯仔Look。再者，新GS的長闊高達4,850×1,840×1,455mm，增闊又增高、剛性提高了14%的身形，感覺如男友跑了去做Gym操到Body更Fit一樣。
內櫳鋪排體貼細心
揀男友，內在美當然比外在美重要，軸距達2,855mm令後座臂彎抱得女友更舒適；加大至530升的尾箱容量方便女友瘋狂購物；加入了大量金屬配件、LexusLED行針時鐘的真皮內櫳令豪華升級更襯女友；8吋中央顯示屏、智能感應冷氣系統、第二代遙距觸感操控儀及駕駛模式旋轉按鈕等設計都令駕駛時更輕鬆，足見男友變得更體貼細心。第四代GS的性能由300降為250，引擎容積縮小至2.5公升V6引擎，力量輸出只得209匹馬力及253Nm峯值扭力，雖然駕駛感覺沒有第三代般澎湃，但加速時的力量就相對較溫柔線性，更適合女生操控。況且配合風阻系數只有Cd0.27的低風阻設計，平均油耗成功降至10.6km/L，油費每公里約$1.5，似乎更了解愛實用慳荷包的管家女友。最後有強化穩定舒適的AVS電子控制懸掛系統配合GS出名寧靜的車廂環境，女友可於懷中甜蜜入睡。若志明真的可以為春嬌如GS般作多方面改變，到時只怕唔止一個尚優優爭住搶志明走喇！
LexusGS250Ultimate規格：
引擎：2,500ccV6
馬力：209PS/6,400rpm
扭力：253Nm/4,800rpm
傳動：六前速電子智能自動波，後驅
售價：$649,900（新車推廣價）
查詢：25119430（LexusHK）
