特首選舉之後，民主黨又要開始為9月立法會選舉做準備，正所謂「三軍未動，糧草先行」，第一件事梗係要籌選舉經費，所以民主黨上星期開始賣獎券籌款。有民主黨人講笑話，今次獎券賣得好過舊年，同何俊仁喺特首選舉入面嘅「精采演出」有好大關係。
論壇抽水市民勁buy
話說何俊仁呢個特首「超級評論員」在選舉初期，係咁俾人踩佢唔掂，不過出席選舉論壇「上晒身」，係咁抽隻豬同隻狼水，睇到觀眾拍爛手掌。上星期仁哥落區賣獎券，市民爭相要求合照簽名，連買獎券都特別疏爽。
民主黨副主席單仲偕亦話今年籌款反應好好，總幹事林卓廷透露，雖然獎券開賣僅一星期，已經較去年賣獎券籌款收入多廿個巴仙！不過去年民主黨黨慶、高價投華叔墨寶嘅CY，據聞暫未有入手。CY要搞大和解，係咪應該有啲表示，以行動支持吓民主黨呢？