俗語話，舊嘅唔去，新嘅唔嚟，除咗適用於情侶分手、特首換屆，其實連飛機都啱用。波音747客機曾經係全球最大、載客量最多嘅民航客機，稱霸航空界30多年，但自從空中巴士A380面世，B747步入沒落時期。新加坡航空公司噚日就為佢哋最後一架B747搞歡送派對，特設B747紀念航班，讓退休機長同乘客齊齊把酒高歌，見證B747喺新航38年歷史嘅最後一幕。
最後一班新加坡航空B747客機，噚日由香港國際機場出發，飛往新加坡；新航特別喺禁區設舞台，派出空姐喺台上載歌載舞歡送「空中女王」B747，大唱「seemefly,I’mproudtoflyuphigh」，贏得唔少乘客嘅掌聲，個個爭住同空姐影相。
八方有幸搭到呢班機，乘客由退休新航機組人員到747粉絲，真係乜人都有，個個變成龍友，拎住相機狂影相，希望用照片見證歷史一刻。
最後航機已服務11年
最令人驚喜嘅係新航為呢班機特設嘅晚餐，竟然有五至六成熟嘅牛扒，食落又腍又滑，配埋紅酒就夠晒滋味。唔少人話以前好少會食晒成個飛機餐，但係呢一餐就想連汁都飲埋。
陳先生一家四口專誠搭紀念航班，覺得特別興奮，「因為好難得」。佢話約20年前同家太太嘅拍拖，趁年輕去歐遊，都係搭B747，「當年覺得搭747好豪華」。747見證着陳生由拍拖到結婚，甚至家兩個女都10幾歲大，陪伴佢走過好多世界各地嘅足迹，「747退役都可惜，當然會有其他機取代，時代會進步」。
新航公關話，新航最後呢架747已經服務咗11年，以新航平均機齡6年去計，呢架機有返咁上下年紀，所以已經賣咗畀俄羅斯一間航空公司。新航會用A380取代747。四個幾鐘機程好快完結，臨走前，新航向每位乘客送上登機證書，當走出機艙，都好依依不捨，不停咁拍掌。
話你知
曾成為全球最大機隊
新航喺1972年向波音訂購兩架被譽為「空中女王」嘅B747-200客機，翌年10月1日首航由新加坡經香港飛東京。94年，新航接收第23架B747-400，成為當時全球最大嘅B747-400機隊。03年，新航擁有39架客機同12架貨機，係新航擁有最多B747飛機嘅時期。
01年，新航接收最後一架B747客機後，之後陸續以A380同B777取代B747。
mailto:[email protected]