新晉女歌手連詩雅，去年初試牛刀，跳入大銀幕演戲，與陳柏宇、何佩瑜等人擔演《喜愛夜蒲》。在戲中，連詩雅飾演航空服務員Jennifer，是個為愛情勇於爭取的主動型女仔，與在夜店認識的「萬寧哥哥」沈志明，女上男下激咀、埋身肉搏咀到面都歪嘅場面甚多，演得收放自如，毫無瑕疵，成功入圍角逐金像獎新人獎。不知是她演技太精湛，還是觀眾看得太熱情，有人連爆連詩雅舊史，翻舊帳指她在戲中根本在演活自己，平時愛煲煙且攬仔無數。
撰文：王連連
連詩雅接連被爆舊史，若攬仔無數這些傳聞屬實，如此多人生經驗，應該很容易拿捏Jennifer一角，連詩雅連聲否認：「可能我個樣俾人覺得似係好wild嘅，但我冇試過好似戲入面咁激。佢會主動爭取愛情，我真人係好被動，如果去到蒲嘅地方，只係同認識嘅朋友傾偈。我唔會主動同陌生男仔講嘢，係幾怕醜㗎！細個嗰陣如果好多人一齊，都同過朋友去蒲過，有玩過嘅階段，但投身社會做嘢，就算未入行，我都有份正職，已經認真工作，好少放工出去玩。」
問到是否容易揣摩角色？她說：「某程度上OK，日常生活嘅我，同戲中嘅性格唔同，但咁先好玩，如果角色同真實嘅我都差唔多，就唔有趣喇！」
謝絕一夜情
自言少夜蒲的連詩雅表示，到夜場通常與大班朋友談天說地，在這些地方認識的人，亦會特別提高警惕：「會好小心識朋友，唔單止男仔，女仔都係，總係覺得去呢啲地方玩得多嘅人，係成日玩唔認真，都要傾好耐偈，覺得啱傾先會交換facebook聯絡。」連詩雅自言缺乏安全感，結識新朋友會小心觀察。
至於有否試過與在夜場認識的人拍拖？她想了一回說：「唔係太記得，但應該冇喇！去夜場有試過俾人追，但知佢鍾意蒲，就絕對唔會同佢一齊，會有戒心。」至於可會接受一夜情，她反應甚大說：「一定唔會啦！第一晚識人唔會跟人返屋企。」
連詩雅形容現實中的自己是怕醜兼被動，但拍拖時就會很投入：「我細個都幾無理取鬧，拍拖同男朋友多數鬧交，唔識體諒對方，試過錯失咗好嘅姻緣。人大咗，就會識體諒人，不過間中都有啲野蠻女友上身。拍拖好易影響工作心情，會所有心機都放晒喺感情，我個人好眼淺，又易眼腫，如果有乜喊完第二日要影相做嘢咁點算？」
懶理傳聞，首次拍戲已大呼過癮，連詩雅憑《喜》為她帶來更多名氣，更先在香港電影導演會獲得2011年席新演員銅獎，又在金像獎獲提名新人獎，對手有蕭敬騰、吳千雨、鄭爽，她說：「我最睇好蕭敬騰得獎，有得入圍已經緊張又興奮，第一次拍戲就有得提名。喺屋企做觀眾睇咗咁多年金像獎，家有機會行紅地毯，感受現場嘅緊張氣氛，真係好刺激，我當贏咗㗎！」
不甘做花瓶
回想最初拍戲，連詩雅說：「最初拍戲唔慣，24小時喺度做嘢，要keep住個情緒同狀態都幾難，但慢慢就習慣，家抽離角色都做到。我鍾意睇張栢芝同鄭秀文嘅戲，做得好出色，最難係喺套戲入面短時間內表現到喜怒哀樂，好想同佢哋合作學吓嘢。」
連詩雅想試不同類型角色，不甘於被當花瓶︰「當然唔想人哋覺得我係花瓶，我好熱愛工作，唔想做冇生命嘅花瓶，只係得外表。我想試多啲唔同角色，靚嘅醜嘅、古裝科幻都可以，但鬼戲恐怖片就唔好喇，因為唔知點拍，投入咗個角色，咁我都會好驚㗎！」