人稱DreamBear嘅劉夢熊係搞飯局高手，一場「黑金飯局」令佢紅爆，拖累狼振英民望唔見咗十個百分點。見過鬼、唔怕黑嘅DreamBear噚日又同元朗一班鄉紳搞飯局，今次佢哋唔再深入流浮山小桃園酒家，轉戰元朗市中心，喺西菁街嘅「紅爵御宴」開餐。
小桃園歷史悠久，裝修略為殘舊，反觀紅爵御宴係新派酒樓，開張僅幾個月，OpenRice都未有佢嘅file，酒樓嘅吊燈水晶，隨時多過酒樓嘅蝦餃燒賣。當日小桃園嘅黑金飯局食得好豪，又飲紅酒又食鮑魚，但由於今次飯局係食晏，相信食得無咁豪。呢間酒樓，點心小點14蚊，最貴頂點31蚊，街坊酒樓價，噚日飯局「光明正大」，鄉紳們請埋在場記者，開咗三圍先夠坐。