還記得電影《春嬌與志明》一句對白:一世人流流長，總會愛上幾個人渣……如果由情場變股場，經常炒出炒入的朋友，今世人肯定會買到幾隻長期停牌的衰股。與人渣分咗手，最多痛一年半載，但遇上衰股，仲要長期停賽，想割席都難。
截至3月底，停牌超過三個月以上的股份有38隻，九間已進入除牌程序外，其他大致上仍要待公司處理未解決事項，即係等運到。出軌的男女，從行為及小動作等皆有迹可尋，同樣道理，被停牌的衰股，出事前都有蛛絲馬迹。簡單來講，睇實四項特點，差不多可以避開九成，餘下一成都畀你買到，真係可遇不可求。
第一點，董事劈炮跳船。這點恍如電話通訊及短訊紀錄無晒一樣，做得太過着迹，唔懷疑至奇。去年瑞金（246）、伯明瀚（2309）、百營環球（761）及福和（923）停牌前，都有主要管理層及執行董事辭職唔撈。
劈炮理由，清一色都是以個人發展為藉口。越是高層，所掌握集團營運及財政狀況越詳盡，亦是第一批發現公司可能出事的人，明知隻船要沉，跳船自保亦無可厚非。中大國際（909）兩執董停牌前數日被暫停職務，儍仔都知出事啦。
股東售股 核數師劈炮
第二點，股東賣股。中國森林（930）及高寶綠色（274）停賽前，主要股東皆沽出股份套現走人。作為大股東，絕少於市場減持，如果引入基金股東，一般以配售形式間接減持。直接在場內沽貨，好聽就話增加市場流通量，實際是發現異樣縮沙走佬。試問你見過超人賣股嗎？真的出現的話，我想比他講撤資更嚴峻。
第三點，延遲公佈業績。若你另一半指要花更多時間搜集資料，延遲同你慶祝生日或紀念日，這段關係已差唔多玩完。去年3月群星紙業（3868）放榜前指要延遲，最終出到業績，核數師卻保留意見。今年歲寶（312）延遲放榜，最後反口出唔到，如果投資者醒水，可避免損失。
最後一點是換核數師。BIG4核數未必包無事，但如果連請中小型會計師行的費用都傾唔掂要更換，真係講唔通，好似高寶12月底截數，核數師1月唔撈，費用事少，避嫌更大。去到核數師劈炮，已經走得太遲，衰係這點的股份，理據上同捉姦在床無分別，一般都係即時紅牌長時間停賽，博士蛙（1698）早前宣佈德勤跳船後居然仍可照常買賣半日，簡直係神話。
耶穌死後三日復活，但股票一旦出事停牌，最衰當然係除牌渣到無，倘若遇上如大凌（211）停牌七年八個月始獲復牌，困你三年又三年，真係喊都無謂。因此，一旦發現股份有出軌迹象，要狠心即飛。炒股無本得個殼，空悲切。
股榮