睇完歐聯同歐霸4強名單，我真係擔心，最終兩個決賽都係西班牙內訌，不是嗎，8隊波有5隊來自西甲，1隊德甲、1隊英超、1隊葡超。看，歐聯係巴塞對車仔，拜仁對皇馬，歐霸則由畢爾包、華倫西亞、馬體會及士砵亭爭決賽席位，5打3，勝算應該較高吧！
講真，我唔認為以車仔今季實力可以踢垮巴塞，拜仁同皇馬都仲叫做有得鬥，不過我真心希望決賽都係巴塞對皇馬，有乜好睇得過西班牙國家打吡？4月22日睇一次，5月19日又鬥多次，寃家對決往往係最好戲碼，尤其是，若果皇馬可以成為西甲冠軍，巴塞自然更要破壞其好事，但想到歐聯魔咒，未有球隊能衞冕成功，哈！到時唔止打吡，直情打甩髀！正！
本來我從不關心歐霸，只不過3隊西甲對1隊葡超，又令我產生興趣，情況就好像中國乒乓球隊，在任何賽事去到4強時，若3個席位落在中國手上，幾可肯定會十拿九穩地會取得該項冠軍，問題係，西班牙人不會有這種思維，說到底他們不是國家隊，而且我相信每隊都有獨立意志，每個教練都有獨立人格，因為他們不是我們的選委。
想像一下，兩項賽事都由西甲球隊取得錦標的話，意味着什麼？今年夏天的歐洲國家盃，難道西班牙會蟬聯？問題不是我想唔想，你想唔想，佢想唔想，而係其他國家有冇能力挑戰？哎！我其實唔想咁講，都惟有咁講，睇波幾十年，邊一屆唔支持英格蘭？邊一屆唔幻想英格蘭會贏？但係邊一屆又令我收貨？
失望多了，我再不敢抱太大期望，英格蘭如無意外都會8強止步，反而我誠心誠意希望見到的決賽會係由西班牙對德國，最後德國勝出，點解咁安排？德國在兩年前的世界盃有相當可人的演出，只要沒有波歷克，我幾乎可以成為這一隊德國代表隊的球迷會會員，再者，我呢幾年睇得太多，關心得太多西班牙了，係時候換馬！
文：盧覓雪